16 Nov, 2019 沒有你在身邊的第二十一日

今日醒左但無即刻起身,好想瞓多一陣,起身本來想去花場買花比你,但花場個電話cut左,所以最後無去花場,上網見到有套新戲於是快快手食少少野再出去買飛睇戲,本身想去SAA探Miko,但我太遲去book,所以最後full左,咁就直接去戲院,我去左睇獅子山上,買左戲飛,入左戲院,收到SAA what app's, 話有人取消左去探Miko,問我去唔去,我夾過時間都可以, 睇完戲坐車過SAA探Miko,佢都好乖,好開心,好八卦,好羡慕可以出外遊走既朋友仔,當我見到其他探訪者可以同毛孩梳毛時候,我突然問義工可唔可以同Miko梳毛,佢話可以,點知當同Miko一梳毛既時候,我忍唔住喊,完來我三個星期無幫你梳毛,感覺好熟悉,但又好遠,總知又忍唔住喊,但都好快無喊,時間過得好快,半小時探訪就完結,探完Miko我就去食野,食完野就去左買花比你,再買野食番屋企,番到屋企同你換左啲舊花,插左啲新花花比你,希望你鐘意呀,不過我唔小心打爛左個玻璃杯,好在無整親,之後好攰就起梳化到瞓覺,原來星期六我又突然好想你,好掛住你,我希望可以慢慢去習慣,希望慢慢可以真係唔會星期五,星期六再喊,可能要長少少時間,但我會比心機呀。

15 Nov, 2019 沒有你在身邊的第二十日

今日一早起身,如常聽收音機,睇電視了解出面交通情況,同平時一樣時間出門口,今日食左野先出門口,平時我最期待的星期五,原來現在一點都唔期待,當我以為可以慢慢放下既時候,原來唔係,我等左一陣有車番工,但坐巴士既時間又會想起你,仍然都會喊,可能你會笑我話我無用,因為有幾愛就有幾痛,喊左會好啲,比平時遲左少少番到公司,之後到食lunch,食野時都有同同事講,開始喊少左,但同事話你走左就要向前,唔會因為你走左所有野就無晒,其實我唔係好敢再同人講我有幾掛住你,因為大家都覺得我唔可以再係咁樣,我明既,但我暫時都未可以做到,之後食完飯番去開工,好快就到收工,落到巴士站好快有車,但塞左好耐車先番到屋企,落左車再買野食番屋企煮,其實今晚有點想你,都有忍唔住喊呀,但好快就無野,因為睇電視可以讓我暫停想你,睇完就瞓覺呀。

14 Nov, 2019 沒有你在身邊的第十九日

昨晚又瞓得麻麻,最後開住收音機有少少聲就可以瞓到,好快又到天光,之後快快聽下交通情況,之後落去睇下,都等左好耐先有巴士,上左車,無位坐,但都如常上車,企左差唔多二小時先番到工,話咁快就到收工,快快手夠鐘就走呀,番屋企食野,食完睇一陣書,睇一陣電視就瞓覺。但仍然好掛住你,你要好好生活,我一定會記得應承過你既事,我會守信用呀。

13 Nov, 2019 沒有你在身邊的第十八日

昨晚係你離開二個星期多,第三次夢見你,第一次就係你走左幾日後,我夢見你個樣但係龜龜身,好快就變番你狗狗樣同身,第二次夢見你都係正常係狗狗樣同身,昨晚夢見你,你同我講,你走個晚肚仔痛,不過又唔係真係好嚴重,夢境中入面既你唔辛苦,同平時一樣,多謝你,每一次夢見你,我都沒有喊,正如大家所講,你好錫我,一直都保護緊我,一樣,發完夢就要起身番工呀,今日同昨日一樣,交通一樣混亂,一樣無巴士,無西鐵出去九龍番工,最後我上左去探湯丸,Coffee, 大家傾下講下,睇下電視,最後去左食野,食完先番屋企,睇多一陣電視就瞓覺呀。

12 Nov, 2019 沒有你在身邊的第十七日

今日如常一早起身,交通有點混亂,所以照樣去左西鐵站同巴士站到睇睇情況,但完全停晒交通,所以無得出去番工,咁唯有買定野食,番屋企,執左一陣野,我就去瞓左一陣,瞓醒之後都係下午三點左右,開電視睇左一陣,突然想出去走走,於是決定跑跑步,由屋企出發,邊跑邊影下相,再行下,最後去到劇院,平時同你一齊行既路,最後我行入去運動場跑左二個圈,之後再慢慢行番屋企,再食野。

11 Nov, 2019 沒有你在身邊的第十六日

今日一早起山身有同你傾計,但一樣都忍唔住喊,但傷心比之前一樣少左一點點,今日比平日早左出門口,但一樣遇上我控制唔到的事情,最後坐小巴,轉巴士,再坐巴士出到市區,但我暫時都唔可以坐太耐車,還要遇上大塞車,最後還是選擇落車行左1.5小時再坐巴士番工,大家都好忙睇各區情況,同埋傾下食咩,時間都過得好快,之後可以放早二小時,收工去到巴士站,但無車,所以轉左去坐地鐵,最後二小時多啲就番屋企,因為lunch食多左,所以晚餐無食,但有飲雪梨蘋果水,仲叻左,睇左少少你既相同video,都無喊,希望我可以慢慢每日都叻少少,進步少少,我記得你既教導,我會慢慢做好啲,生活好啲,對自己好啲,你都要叻仔,飛遠啲,唔使擔心我,好多人會照顧我呀。

10 Nov, 2019 沒有你在身邊的第十五日

今日如常好傷心,好無助,好無力,以為可以瞓晏少少,點知鄰居小朋友一早起身玩,所以好快又醒左,醒左就執屋,拖地,洗衫,所有野都係喊住做,但整完一輪都唔想出去住,最後開始將由你出事前一晚起既事實實在在,將我所有記得寫起blog,因為感覺實在啲,好似同你傾計一樣,我未必見到你,但我感受到你係知道的,你聽到我所講的,所以花了幾小時開始做番紀錄,寫完一輪,都想外出行下,天氣咁好,唔想浪費餘下半日,最後行下行下去左SAA,本想做領犬員義工,但因為full左,只好參觀狗場情況,入面好多狗狗,主要係唐狗為主,慢慢行慢慢了解每位小故事,最後見到Miko故事,佢係一位就快12歲貴婦女,但11歲個時被主人以搬屋為名掉左出街,後來比人送左嚟SAA,最後見到一位黑蚊蚊小朋友灘左起個籠入面,我又忍唔住喊,好快我決定助養Miko,希望幫到佢之外亦幫助到我自己,搞好手續我就出去食野,食完就快快手坐車番屋企,番到屋企就睇電視同休息。

9 Nov, 2019 沒有你在身邊的第十四日

今日一起身,叻左無喊,但坐坐下又喊過,之後執起晒你既食物,同衫,同被出嚟,只係忍心比左幾條新毛巾,二件全新未著過既衫捐出去,其實太多你既野我唔想咁快送比人,但仲有袋,仲有車,仲有好多好多都唔可以咁快比人,邊執都無大問題,執好之後就捐去SAA,捐完再去食野,之後又行去yoho再行番去平時同你walk既地方,最後行到公園,我決定坐定定出post,主要係唔想大家都再擔心我,但真係好傷心,每打一個字對我嚟講都好難,因為我無方法唔想起你,打一篇野,用左成包紙巾,終於都寫左,之後喊完又起身,準備去食野,買滋潤飲品,我記得要好好對自己,買完再去食野,點知食物未到之前又上左你既fb到望下,點知見到大家留言又忍唔住爆喊,邊食邊喊,又用左一包紙巾,食完喊飽就番屋企,再同朋友講聲你走左,當然邊講邊喊,同樣亦有朋友pm我,話知你走左好傷心好難過,我地傾完一輪我終於要休息了。

8 Nov, 2019 沒有你在身邊的第十三日

本身今日係放假,但同事唔比,大家知我放假無野好做又亂想一通,最後提議我番工,都係既,無左你我咩地方都唔想去,無野令我提我起勁,今日好似好番啲,今日跟同事食飯,傾下講下好快過,之後又到放工時間,如常坐車番屋企,到落車時見時間尚早,所以想行下商場,本來都ok,點知行到yoho大平地同小公園個邊又忍唔住想起你爆喊,最後都係坐低喊完一輪,點知一上fb,就見到蛋蛋走左消息,心情又再差起嚟,喊完又起身坐車番屋企,番到屋企又到左睇劇時間,好似好番啲,睇完都好攰,又準備瞓覺。

7 Nov, 2019 沒有你在身邊的第十二日

一早起身好無助好無力,好無意義,又係爆喊的一天開始,今日又嚴重左,坐車番工時間,開始覆wapps,當然我好訪實講出心入面既感受,因為我完全幫唔到自己,我有想過做傻事,但想過無能力去做,點解會咁,我都唔知道,點知公路又撞車,所以塞左好耐,我又更加喊得緊要,最後喊住番到公司附近,就收到灰灰突然走左消息,好難過,真係唔知講咩好,喊住番到公司,第一件事就係想請假,點解唔知,好唔容易又捱到放飯時間,最後去左食車仔面,當然又喊到豬頭一樣,之後又番上公司,又好似好啲同同事傾下計,食下野,話咁快又放工,好似好啲,都無喊,番到屋企都好啲啲,食野同睇電視,之後就瞓覺。

6 Nov, 2019 沒有你在身邊第十一日

一早起身望到你將相一摸就爆喊,好無用的我,喊完一輪先刷牙洗面,整好晒再出門口,當然都係不停喊,見到同你行過地方又喊,見到有人放狗又喊,見到任何野都喊,番到公司只要有同事一問我你點,又喊,好難先捱到lunch時間,最後選擇自己食,因為唔想喊住食飯嚇親人,朋友都不停wapps我,問我點樣,其實我明大家錫你同擔心我,但一講就喊,所以只要望到我多數都唔敢即時回覆,盡量放工後先覆,大家開始會叫我搬屋,出去食飯,搵多啲朋友傾計,唔好自己一個起屋企,去學下野,出去旅行散下心,樣樣都有提議過,但原來我個心未ready做任何野,聽落好似好誇張,但事實如此,做唔到亦都無方法,唯有時間先可以幫到我,之後再等到放工,好想快啲收工,番屋企,可能多年習慣,放工番屋企其實都無野好做,因為每樣野都提唔起勁,唯一係食野同睇電視我係會想做既事,當晚收到茶爸同Karen ee wapps, 但我個晚真係唔想覆任何wapps,點解,因為一聽到wapps聲,個心又莫名的怪感覺出現,所以唔敢覆,最後就瞓覺。

5 Nov, 2019 沒有你在身邊的第十日&告別禮

整夜難眠,一早請左假,但如常一早起身梳洗,穿上黑色裙子,帶齊所有物品,外出食早餐,一食早餐突然想起你,不停喊,食完大概八點半,快快手趕起坐巴士出旺角花墟買花,一直都想買繡球花,但沒有我想要既顏色,但經過其中一間花店,見到啲花好靚,最反再行多一遍,再問花店有無白色蝴蝶蘭,係緣份,好難買到都比我搵到,即刻買左,再買埋其他襯花,滿天星,桔梗,毋忘我,幾款花之後,就趕去北角會合Rebecca, 因為整左個蓮位比你,上香裝完香,再起北角食lunch,食完再會合Suzen同Johnny,坐的士過去觀塘,上到去告別禮場地,Carol比我更早到場,而Fion 都一早送左花籃過嚟會場,我開始同工作人員準備所有野,終於我再次見番你,心情好激動,當時開結有朋友到場,我第一件事,摸摸你既頭仔之後,就抱抱你,好似小儀文章所講,安慰一點點,個心實在一點點,可以抱番你對我嚟講好重要,當抱完之後大家開始摸摸你,為你佈置,本身唔打算影相,最後都決定影相,但無對外公開太多,因為這是你給我的回憶,各位朋友同你齊齊影合照,朋友亦都陸續送上禮物給你,本來放好晒花花,同紙鶴,但我開先抱你個時無影相,最後又再次抱起你,請Alvin幫我同你影相,好感謝佢幫手,影完相時間都差唔多,亦通知工作人員幫你整DNA頸鏈同打手印,之後大家跟你作最後道別,一直都以為我可以頂住,當入到火化房,我亦都忍唔住喊,當大家送完花花比你,我最後送花比你之時,我亦都跟你作最後道別,好難受,好傷心,好心痛,好多野都未講完一樣,最難一關就係要按制,一直都想搵人代我去按制一下,但搵邊個,我一直都無同任何人講過,最後只係不停喊,工作人員問我要唔要幫手,幫我按制,我想因為唔想假手於人,好想為你做最後一件事,最後忍痛按下制,個心好痛,喊到差唔多暈,好在茶爸在場扶起我,我真係好唔捨得你,當以為告別禮後會有所平伏,但原來情緒上又打回原形,火化後喊完,同各位朋友道別後,我同毛媽,Don,在善終公司等你火化好再睇睇骨仔再等磨好先番元朗,本身想番屋企再出嚟食飯,但塞車之後番到去都決定食完飯先番屋企,番到屋企,以為帶左你番嚟會好啲,原來唔係,點解會咁樣,我都唔知呀,但總知無好過,可能因為太攰,所以將你放好之後其他野都係簡單放好就沖涼瞓覺,但三點鐘又不自覺地醒左,無野做,又喊,之後喊到攰又瞓番,之後好快到天光。

4 Nov, 2019 沒有你在身邊的第九日

今日心情好了點,無再望見你既床仔又喊,今日番工天氣唔錯,當然對我仍沒有多好,照樣同同事傾下講下又食lunch,到放工時間,同事比左一個信封我,叫我唔好即刻開嚟睇,要過左你既告別禮之後先好開,咁唯有要聽話,個日番到屋企,執左你件畢業袍,你最愛小茄子公仔,波波,飛碟,小食,罐罐,等等入袋,準備帶去告別禮,當日心情好複雜,心跳得好快,好緊張,好想快啲見到你,但亦心知這是最後一次見面,所以心情難免有啲奇怪,當日Carol ee send左小儀姐姐訪問比我睇,內容係關於Dee Dee 6月份走個日告別禮之上,小儀姐姐選擇抱抱Dee Dee作最後告別,睇完之後,我問朋友,我可唔可以抱你,其實我一直都無想過起告別禮要抱你,因為怕對你唔好,所有事我都由你角度出發,當下我聽完朋友講,我唔想讓自己後悔,我決定當日要抱抱你,還有選用棺木呢個課題,有朋友話好,有朋友話唔需要,最後我只係想做我應為要做既事,價錢起呢刻已經唔重要,重點係我唔想將來後悔。

3 Nov, 2019 沒有你在身邊的第八日

一早起身收到Karen wapps, 佢搵人畫左張畫比我,當我見到張彩虹畫,我忍唔住喊左好耐好耐好耐,平伏過後就繼續整video, 今晚約左毛媽一家食飯,我好努力搵左一張你剪完毛又打左bowtie既相告別禮當日同之後放在家既一張相,由於時間關係我下午六點先出動去曬相,好在晒得切同埋唔貴,老闆仲提議我過膠,話可以保存耐啲,好啦,整完再同毛毛一家食飯,大家傾下,講下,好快食完飯,我都番屋企沖涼,瞓覺。

2 Nov, 2019 沒有你在身邊的第七日

一早約左朋友出去花墟買花,作為你告別禮之用,早上心情好一點,出到花墟完全無認真想過買邊種花送給你,但我深知只要係我選擇的,你一定會喜歡,行完之後再跟朋友食午餐,食完後,我在旺角商場行行走走,為的只係買一條黑色裙,多年都沒有穿裙子除左番工外,對上一次穿裙,應該係三年前Jenny ee婚禮上, 所以今次送別禮,還是特意穿上裙子, 尊敬一點,還是有其他意思,大概想讓你放心一點, 本身之前買一第一條,但唔啱身,星期五再買了另一條,但太鬆,最後還是買左第三條,女孩子大概要買野就總有萬千個理由,這段時間,我想做的事大家都沒有阻止,只要唔太過份大家都由我去做,買完之後就番元朗,買野番屋企食,當日係你離開一星期,我仍然好唔習慣,真的,屋企無聲,感覺好靜好靜,仍想番起當晚你走情境,喊完好快就瞓左。

1 Nov, 2019 沒有你在身邊的第六日

我開始叻左,開始同平時一樣同朋友在wapps傾計,開始番工前喊少左,坐車都喊少左,番到公司可以做到野,當然只要一有人wapps,pm我問起你,我又會忍唔住喊好耐,久久未能平伏心情,點解我咁無用,我做唔到大家所講正能量,我做唔到加油,我做唔到既野太多太多,我沒有強迫自己,亦都迫唔到自己,番到工,食到野,瞓到覺對我嚟講已經好難得,好重要,當日終於同同事一齊去食lunch, 可能因無佢地唔係養寵物人士,所以有一份舒服感覺,我地話題唔只在於寵物,好快食完飯,亦都好快放工,當下到六點,慣常好快手執袋,個心好想快啲番屋企,但落到公司樓下先記得,你都唔起屋企,我咁急趕番屋企做咩,又忍唔住起街到喊,又將我辛苦儲存番嚟既野一下子打碎了,吹完風,就出旺角拎裙,再入粉嶺拎小食及跟朋友交收,朋友好有心送左一張好靚漫畫比我,這是你的生日禮物,朋友陪我食飯,傾下講下,番到屋企已經00:30,放好張畫,又忍唔住喊,喊成為我生活日常一部份。

31 Oct, 2019 沒有你在身邊的第五日

哈佬喂的日子,往年一定幫你裝身打扮一下,今年沒有,只係靜靜的過,一早如常番工出門口,但又突然無故爆喊,感覺好難受,我可以點做好,我都沒有法子,自你離開後,我好少講野,好少出聲,好少上網,樣樣都做少左,但唯一係喊多左,番到公司,好飲好了點,因為生活總要過,亦唔想身邊人難受,終於跟同事有講有笑,有傾有講,以為我可以開始無事,開始習慣,開始過度新生活,回家好似好點,都沒有喊,如常睇電視,正常時間瞓覺,但一樣三點就醒左。

30 Oct, 2019 沒有你在身邊的第四日,這是你14歲生日

今日係你正日生日,一如往年一早請定假去陪你,但可惜,我請了假,但你不在我身邊,我搵左成晚相,今日著手整video,我選左以下十隻歌希望在你告別禮當日播放。
感激我遇見
我的驕傲
深愛著你
Miss you Finally
愛是永恆
Today
Love paradise
愛比我重要
Mommy love you so
聽風
每一隻歌都係包含住我對你想講既說話,當日遲遲都未整好,搞到五點左右先出街,當日用你既名義捐左少少錢,亦請朋友低調處理,之後去整頭髮,食飯,再回家,當晚心情難免有啲傷感,因為過往你生日都會陪你慶祝,今年變得不一樣了。

29 Oct, 2019 沒有你在身邊的第三日

今日如常起身,見到你既床就喊到收唔到聲,喊住沖涼,洗頭,喊住坐車,喊住食早餐,住喊住番工,一直都想幾時公報你離開消息,火化後,一個月,唔打算講,每一個時間都有想過,有朋友話想講就講,唔想講就唔講,但我實在唔想越嚟越多人個個問我,每一個問一次,我就傷心一次,再加上30/10係你生日,所以我選擇起你生日前夕,忍痛起fb寫上你離開消息,當post左之後,我收到好多wapps,pm,都問你點解走得咁突然,咩原因,我一概沒有回應,自你離開之後,,我好少上fb,因為對我嚟講沒有意思,其他野我無再關心過,只不過當日要出post,我再去番你既戶口,出完post我即時登出,可能你會話我無用,但我無野可以做到,到收工時份,我再次看看你fb,見到每一位錫你既朋友留言,我又再一次傷心落淚,大家唔捨得你,好傷心,好難接受,我何嘗唔係一樣,之後知道你定左邊日火化,就落實想請我認為好想能夠出席送你既幾位好朋友,好感謝幾位好友一口答應,平日大家都要番工,嚟唔到都明白,之後陸續有同你玩開既朋友都話想親身送別你,本來只想幾位朋友出席,變成20幾位出席,處理完火化之事,我希望可以用十隻歌去好好記錄你一生。

28 Oct, 2019 沒有你在身邊的第一個工作日

今日比平日早出門口,但不停喊,不停想起你,車程最辛苦係過大欖隧道同青馬大橋,因為想起前二晚出去睇急疹情境,同埋帶左你出去,最終我無辦法帶你回家,我之前send wapps比一位我好信任朋友,我同佢講我ok, 當一刻我呃緊大家,但我選擇對呢位朋友坦白,我一啲都唔ok,我喊唔停,我控制唔到自己,寫了好多好多我當刻感受,最後呢位朋友好快回覆左我,佢無試圖叫我當無事發生,無叫我唔好喊,我以為可以好一點,因為早出門口,所以比平常早回到公司,之後有第一位同事回來,只係簡單問我"早呀,仲咩咁早番到呀",我只係爆喊話B仔走左,同事紛紛安慰我,當然我全日沒有工作,只係在位到喊,當日全房同事都比平時靜,都唔敢問我太多,好唔容易到放食飯,我選擇自己食飯,沒有同任何人一齊食,食完飯,就如常番工,wapps仍收到朋友安慰,慰問,之後收到朋友wapps,阿B點呀,仲咩幾日唔見你update fb既,無咩事麻, 我開始面對另一個問題,最終我都親自同呢位朋友講出事件,到我收工時間,平時永遠要等車,永遠無位坐,當日有四部巴士等人上車,仲好多位,坐車其間,有一位平時唔多聯絡朋友,問關於西施狗狗踏入老年時間,開始多生瘡問題,傾計時間過得好快,一直都無刻意講出你離開消息,去到尾聲,朋友話有時間帶你入去DB玩,我終於講出你離開消息,朋友都好傷心,但感覺還可以,我沒有太傷心,沒有喊,當晚我食完飯,選擇上毛包豆屋企探下三位,短短半小時我完全無太傷心難過,可能因為又要摸頭,又要抱,又要摸肚,實在太忙了,短短半小時我離開回家,因為趕回家睇電視,番入屋,睇完電視,朋友剛打嚟,時間配合得唔錯,傾完又好似好啲,最後如常瞓覺,不過好快,三點就醒左,之後瞓唔番。

25-27 Oct, 2019 不一樣的五六日

希望未來每一日都可以好好紀錄每日感受,由你離開的前一晚開始,當晚遲左收工,放工後如常回家,一回家見到地上有你嘔吐過的嘔吐物,快快手問問你情況,你如常行過來跟我打招呼,以為你太肚餓,快快煮野比你食,但你都食不下,以為只係小問題,於是叫你乖乖的休息一下,好好瞓一下會無事,點知都持續嘔,屋企有止嘔同止痛藥都唔可以減少嘔吐情況,於是即刻call的士,再出市區睇醫生,在的士內你都有點痛都有叫,同只係嘔左一次,好快去到診所,醫生跟我了解你既情況之後,即時驗全血及胰臟炎test,我跟你只好在外等待,你好乖,靜靜地休息,又好像讓我放心一點,醫生之後出來,跟我說,你所有報告好正常,完全無問題,可能只係普通嘔吐,醫生幫你打左止痛,保護腸胃二支針,我地都沒有即時離開診所,怕一離開你又唔舒服,最後都留在診所等了個多小時,清晨五點左右先離開診所,以為你會好一點,我地都拖住疲累身驅回家,回到家沖涼整頓好都已經是早上七點,當我以為你可以跟我好好安睡之時,完來你仍然發出細細聲的痛楚叫聲,本身都book左26/10跟你睇醫生,本身只係睇腳仔,打骨針,所以當時你既情況,我唔需要擔心無位睇醫生,最後決定睇元朗診所,係因為你太痛,跟本承受唔到由屋企出荃灣既路程,去到診所,醫生如常問你情況,醫生按正常情況跟你驗血同胰臟炎test,同前一晚一樣正常,醫生最後決定幫你照超聲波,我沒有異議,但當我一行出診症身門外,醫生即刻叫我入內,原來你姑姑位置出現血斑,醫生問我你發生咩事,我跟本唔知道,好似好無用,點解無留意到,醫生話似內出血,即刻照完,醫生話你肚內發現一個水泡,血瘤,總知唔尋常,唔知係咩嚟既物體,暫時都唔知係咩嚟,我當時問醫生可以點做,醫生話要做針穿先知係咩嚟,但原來醫生都未遇過呢個case,亦都唔排除有塞腸,但驗血報告完全反映唔到個瘤係惡性腫瘤,當時我沒有想太多,只係請醫生幫你打止痛針,醫生話回家先,再唔得星期日再落去做顯影劑測試,內心都一百萬個問號,離開診所,即時搵張醫生,但已經full左,我唯有book定28/10,之後去食少少野,點知食野其間都有叫,成日想落地,以為你想去廁所,你好乖,落地係去左廁所,但都企唔穩,我又再跟素素一起陪你番診所,但醫生話這是正常的,剛打左止痛針一個多小時,沒有這樣快會唔痛,叫我帶你回家好好休息一下,當回到家都晚上七點,本想沖涼同坐起梳化瞓下,但你睡不好,又想起身,唯有陪你,之後再餵你飲水,你好乖,有飲到水,以為好一點,過左一小時後,再想餵水,發覺你唔肯飲,一打開你的咀巴,發現牙肉無色,手腳開始凍,我即刻打去附近診所同call車,但診所要收工,唔接,我唯有call車即刻同你出市區診所,我一直抱住你,拖住你,你一直都發出輕微聲音,但好乖,當過左隧道,你呼吸聲越來越急,越來越大聲,但仍感受到你既心跳聲,唔知過了多久,突然感覺你沒有心跳,素素當時話你仲有心跳,可能因為我跟你心連心,個份感覺最確切,去到診所,即時同姑娘講你情況危急,姑娘一見到你,再摸一摸你既頸仔,告訴我你已經離開,另一位姑娘再來確認一下,都確實証明你離開了,當時姑娘有問我,要唔要請醫生幫你搶救,我喊住話唔需要,因為我唔想見你辛苦落去,最後姑娘借出房間,讓我跟你作一個簡單道別,當時我情感上好傷心,好難過,但理性上我好快打比善終公司,好好幫你處理你身後事,當時只跟幾位十分相熟朋友及我相信唔會將你事件對外公開朋友道出你離開消息,等善終帶你離開診所,我同素素一齊番元朗,食完野,差唔多三點回到家,沒有你在身邊,完全瞓唔到,好傷心,好難過,完全瞓唔到,到清晨五點,我如常起身,可能係多年習慣跟你一齊外出散步,當一刻我如常沖涼,洗頭,跟同你平時散步路線去行,當然沒有你,感覺不一樣,世界不一樣,行完平時跟你行路線,我一樣去跟你平時食開茶餐廳食早餐,我係會肚餓,但食物只係填滿肚子,沒有其他意思,食完早餐,當時係早上八點半,點解時間過得咁慢,當時我唔想番屋企,我選擇去總站坐968遊下車河,全程車,我眼淚不停落下,好辛苦去到天后總站,落車之後,再轉電車,再坐去跑馬地,我想去一個曾經同你去過寵物公園,去到點知大裝修,我唯有獨自去左隔離小公園,公園一個人都沒有,我呆坐中,不停喊,不停幫你安排火化時間,但同樣都要同朋友報平安,對上一次咁傷心,應該係2005年12月尾,阿婆同老闆相隔六日先後離逝,今次你離開,對我打擊好大,我講唔出心痛,我除左喊,好無助,之後喊左二個多小時,我照番之前坐電車,坐巴士回家,一回到家,所有你既物件都讓我十分傷心,好難過,之後我通知左毛毛媽,身在新西蘭的她知道你走左一樣好傷心,好難過,當你離開,我地無人唔傷心,唔難過。

5 APR, 2007 - b仔日誌

各位,我今日真的沒有街街去呀

,主人番工就話冇時間陪我

,今日放假又唔帶我出去,真係激死人呀

,唔知會唔會5日假期都冇街街去

,你地同我的主人講下叫佢同我去玩下啦,仲有我在上個月去左動物醫生的第二部份考試(身體檢查呀),我好叻仔,合格左,不過都係要等佢地最後批准先可以成為建習動物醫生,到時真係要第一時間通知各位呀,

你地要多多支持下我先得呀.

5 APR, 2007 - 狗狗十誡

我有日在家中和狗仔玩耍時, 我伸隻手俾佢, 但佢一野咬落去, 但好細力
請留意第七項......

這十條都是以狗狗角度來撰寫，提醒有養狗念頭的人,必須具備那些心理準備,
你準備好可以照顧另一條生命了嗎?

1.My life likely to last ten to fifteen years. Any separation from you will be painful for me. Remember that before you buy me.

 1.在你把我帶回家之前,請記得,我的壽命約有10~15年;你的離棄,會是我最大的痛苦.

2.Give me time to understand what you want of me
2.請給我一點時間,讓我了解你對我的要求是什麼.

3.Place your trust in me--it's crucial to my Well-being.
3.信賴我--那對我非常重要.

4.Don't be angry for me for long and don't lock me up as
punishment.
You have your work,your entertainment and your firends.I have only you.
4.請別對我生氣太久,也別把我關起來當作是懲罰. 你有你的工作,你的娛樂,你的朋友. 但你是我的僅有.

5.Talk to me sometimes. Even if I don't understand your words.I
understand your voice when it's speaking to me
5.請偶而對我說說話, 縱使我不懂你說的內容, 但我聽的懂, 那是你的聲音在陪伴我.

6.Be aware that however you treat me.I'll never forget it
6.你要知道無論你如何對待我, 我將永遠不會忘記.

7.Remerber before you hit me that I have teeth that could easily
crush the bones of your hand, but that I choose not to bite you.
7.當你打我時請記得, 我其實擁有可以咬碎你手骨的尖銳牙齒, 我只是選擇不咬.

8.Before you scold me for being uncooperative,please ask yourself if something might be bothering me. Perhaps I'm not getting the right food,or
I've been run in the sun too long or my heart is getting old and weak.
8.當你因為責罵我的不合作、固執或懶惰之前,請你想想, 是否有什麼正困擾者我. 或許我沒獲得我應有的食物,我已經很久沒在溫暖的陽光下奔跑,又或者我的心臟已經太弱及太老.

9.Take care of me when I get old.you too,will grow old.
9.在我年老時請好好照顧我. 因為你也是會變老的.

10.Go with me on difficult journeys.
Never sayＩcan't bear to watch it or let it happen in my absent.
Everything is easily for me if you are there. Remember, I love you.
10.當我要捱過最辛苦的歷程時,
請千萬不要說：「我不忍心看他。」或者「讓我不在場時才發生。」.
只要有你和我在一起, 所有的事都會變得簡單容易接受.
請你永遠不要忘記, 我愛你.

--------------------------------------------------------

狗狗的愛是沒有條件的，牠不計較人的美醜，也不計較你的手不能動，牠已經準備好深愛著人類，但人卻不懂的珍惜。

人類何時才能進化成更高等的動物，才不會辜負狗兒的忠心陪伴

5 APR, 2007 - b仔日記

               
各位哥哥姐姐,我係b仔,今日係4月5日清明節,我的主人真係好豬呀,係懶瞓豬呀,瞓到成11:00,都唔同我去街街,我冇街街去會好悶呀,希望今日可以有得去公園玩下我都好開心......

1 APR, 2007 - 西貢一日遊

今日是星期日

,我今日同b仔因為有狗狗朋友的邀請,

再一次去到西貢,

西貢我在對上兩個星期都去過,香港係有購得天堂,美食天堂的美譽,咁西貢亦可冠名為狗狗天堂

,我的狗狗真係好開心

,因為地方大,又空壙,真係一個大公園比狗狗盡情去玩,如果我係狗狗都會好開心,其實全港只係有6個政府批准的狗公園

,但係大型只係得二個,真係比政府玩死,

"動物有什麼罪,點解比人遺棄:失寵,生病,不聽主人說話,動物何罪,請尊重生命"

,但係又唔比人在公屋養狗,有冇足夠的地方比佢地玩,又冇公共交通工具坐,寵物點會唔比人遺棄,我唔係有錢人,不過我一定會盡主人的責任,照顧佢一生一世,但係好多人因為好多不同的原因而放棄,所以主人同我地的政府都有一定的責任,b仔係好幸福的一隻狗狗,佢除左有我這位對佢寵愛有加的主人照顧和愛護之外,亦得到好多好多哥哥姐姐的愛錫,希望各位狗狗同主人都可以在未來的日子共同攜手創造一個人狗共融的香港,最重要係狗狗佢地唔係玩具,係我地的好朋友,家人,希望不論貧窮,疾苦,生病,死亡,大家都會甘苦與共,有福齊齊享,有難齊齊當.

7 OCT, 2013 分享玩具

 

19:00遊花園, 家下大小姐一收工, 番屋企煮落飯, 都會帶我落街行,

愛上行天橋, 自己一落街就自動波上天橋行,

唔算太多人行之外, 唔屎行出馬路, 安全安全.

 

同平時一樣, 行左去公園仔, 見到有位小朋友,

佢媽媽話佢好怕狗狗, 當然我地一開始既時候,

保持住好大好大段既距離,

 

點知佢見我玩得好開心, 慢慢行埋來同我玩,

hehe, 仲借左單車比我坐.